لماذا مدونتى

هى مجرد انشودة حب لبسطاء بلادي ولاتنتمى الا لقليي الذى يعشق وطنى وسوف تنشر هذه الحوارات فى كتاب وعدة صحف

حوارات مع بسطاء بلادى

القسم الثانى فى مدونة حكايات مصر المهروسة

الحوارات

1_ أحلام ماسح أحذية
2 _ واحد حوار سخن وصلحه
3 _ أم العيال
4 _ حوار أخر مزاج
5 _ يا فرحة ما تمت
6 _ وجع القلب
7 _ بحلم وأنا ماشى
8 _ مضروب بورصة
9 _ الله على الأرض

1- أحلام ماسح أحذية
أثناء عودتي لمنزلي فى الرابعة فجرا لفت نظرى ماسح أحذية يجلس على باب قهوة تحت منزلى مازال يعمل بنشاط وكأننا فى العاشرة صباحا. ما أن راني ادخل القهوة حتى أسرع نحوى .. تمسح يا بيه. طلبت له شاى ودعوته لهذا الحوار.
_ ياريت نتعرف ؟
* اسمى عادل من بنى مزار فى المنيا
_ معاك شهادة ؟
* دبلوم زراعة مجموع كبير
_ وليه ما دخلتش جامعة ؟
· مارضتش اتعب أبويا فى المصاريف اكتر من كدا دا يا دوبك عندنا فدان إلا ربع وحمار وجاموسة على سبع أنفار يعنى كل واحد أربع قراريط واقل من ربع الحمار والجاموسة مش كدا وبس دأنا أتجوزت بتمن قيراطين من نصيبى ومراتى بيصرف عليها أهلي علشان بتخدمهم وأنا بسافر لها كل شهر أو شهرين
_ وجيت مصر أمتي ؟
* من ست شهور
_ واستغلت إيه؟
* حاجات كتير فى سوبر ماركى (هكذا نطقها ) ومحل أحذية وفرد أمن بس كل شغله يطردوني
_ ليه ؟
· علشان نفسى أبقى مدير
_ فى إيه ؟
· فى قرية سياحية أو حتى على مصر كلها حا خليها أحسن من الكويت وحا كون رئيس أحسن من حسنى مبارك.
_ لو بقيت رئيس أول حاجة تعملها إيه ؟
· أجيب عقود شغل لكل الشباب ودهالهم بالتقسيط على قدهم علشان يجيبوا خير للبلد
_ وتانى حاجة ؟
· أخلى الحكومة تبطل مسك فى البياعين اللى فى الشارع بس أخليهم يبيعوا على جنب الرصيف علشان يسيبو طريق للناس ونفتح باب الوظايف وكله ياكل عيش ونصدر اللى يفيض من القمح والدرة للدول بأسعار غالية.
_ وفلوس بيع القمح والدرة تعمل بيها إيه ؟
· أوظف الغلابة
_ ومين يضمن انك لو بقيت رئيس تنفذ الكلام دا ما كلهم قالوا كدا ؟
· أنا عارف ان المسئولية صعبة لكن أنا قدها وقدود لأننا بحب الخير للناس وصدرى مفتوح ليهم يعنى مش رئيس وخلاص.
_ طيب مش حا تعمل لنفسك حاجة وأنت رئيس ؟
* لأ أزاي حا جيب سواق يلف بى علشان أصلح الشوارع والمصانع والجوامع والكنايس وحا شغل سكرتيرة حلوة عندي ( يضحك وهو يهتز ثم ينظر لصندوق مسح الأحذية وكأنه يعيده لواقعه القاسى ويكمل بنبرة صوت مغموسة الم ) أنت عارف يا أستاذ دايما مراتى تقولى بلاش تحلم وبص تحت رجليك .
_أنت حابب شغلتك يا عادل ؟
· والله حبيت مسح الجزم بعد ما واحد ابن حلال علمهالى من اسبوعين وحوشت سبعين جنيه واشتريت صندوق مستعمل وبعدين أنا بيضته ووضبته زى ما أنت شايف كدا .
_ ودخلك بيكفيك ؟
· الحمد الله بطلع بتلاتين وربعين جنيه وساعات تضرب وأجيب خمسين جنيه .
_ وتعمل بيهم أية ؟
· بدفع إيجار خمسين جنيه فى اوضة معاى فيها ثلاثة من بلدنا وباكل وشرب وحوشت مية وخمسين جنيه.
_ فين ؟
· مش فى البنك أنا شايلهم فى دفتر توفير.
_ ليه ؟
· علشان الشيخ قال ان البنك حرام.
_ وح تعمل إيه بالمبلغ دا ؟
· سايبه للزمن وح كمل عليه مش يمكن يجينى عيال ومراتى أمانة معايا والعيشة عمالة تغلى تعرف يا بيه أول علامات يوم القيامة إيه ... الغلا يعنى أنا حاسس أن القيامة ح تقوم .
_ ايه اكتر حاجة بتفرحك فى الدنيا ؟
* أفلام عادل إمام ونفسى أقابله يمكن يشغلنى مدير قرية سياحية أو رئيس مصر وأسيب الشغلة دى .
_ حد عارف فى البلد عندك انك بتمسح أحذية ؟
· زمايلى قالوا لبويا ومراتى بس أنا كذبت عليهم وقلتلهم انى شغال فى محل.
_ ليه مش شغله شريفة ؟
· أيوه بس أبويا قالى إنها شغلة عواطليه مع أنى بكسب وحر نفسى .
_ وبعد كلامهم ممكن تسبها ؟
* اسيب إيه يا بيه أنا هنا بعيد عن اهلى والبلد اللى أنت غريب فيها شلح وأجرى
_ كام مرة الشرطة مسكتك ؟
· تلات مرات وكل مرة يكشفوا على سوابقى يلاقونى نضيف يسبونى .
_ حد ضربك ؟
· لأ وأخر مرة كنت لبس الجاكت الحلو دا ( يشاور على جاكته الممزق ) وقلت للظابط أنا باين على ابن ناس يرضيك ترمنى مع المقاطيع فى الحجز قام ضحك ومشاني.
_ يعنى الحكومة حلوة ؟
· حرميه ووكلنها هما والأغنيا وبيدسوا على رقبة الفقير فى الطين ومش عارف الريس عارف ولا بيلعبوا من ورى ظهره بس على فكرة واحد قالى انه عارف.. صدقنى يا أستاذ ساعة ما واحد فيهم ح يموت مفيش ولا واحد فقير ح يمشى ورآه.

2 - واحد حوار سخن وصلحه
عندما رأيت حريق مكتب د/ ايمن نور وعرفت ان زوجته جميله إسماعيل وعدد قليل من أنصاره كانوا داخله حزنت وواصلت مشوارى لقهوة عم محمود النوبى كما أعدت أن أتناول عنده شاى اسود ثقيل وجاءني مرحبا ومعه المشروب وحاول ببشرته السمراء الطيبة ان يلفت نظرى لشىء لم افهمه فدخل القهوة ونادى على
هو / تعالى يا أستاذ علشان تشوف نوع الشاى بنفسك دخلت فقال لى بصوت واطى وعينيه تتلصص على باب القهوة
هو / خلى بالك اللى قاعدين على باب القهوة دول امن دوله
أنا / يعنى ايه
هو / يعنى بلاش تفضفض منا عارف لسانك زفر زى حلاتى
وخرجت لأواصل شرب المشروب الأسود مثل أيامنا الطين الى أن انزاحم من على القهوة فجأنى عم محمود وكأنه يحمل غضبا لايستطيع حمله وسألني مباشرة
هو / بذمتك دا يرضى ربنا اللى عملوه فى مكتب ايمن نور
أنا / ورغم تطابق رأى ومشاعرى مع كل ما قاله الأ اننى أصريت ان استفزه بالأسئلة المعاكسة
أنا / بيقولوا أن أنصار ايمن نور وزوجته هم من بدأو ضرب زجاجات الملتوف
هو / أوعى تصدق كلام كلاب الحكومة
أنا / رأيك أنهم ظلموا ايمن نور
هو / يا عم أنت ها تجننى وتقولى انه مزور
أنا / الله أنت كمان ح تدافع عنه فى دى
هو/ يا عم لا دافع ولا أنيل أنا عاوز اسأل سؤال
أنا / أتنيل .. اقصد أتفضل
هو/ إذا كان ايمن نور أتسجن خمسة سنوات علشان زور خمس تلاف اسم أمال اللى زور صوت ثمانين مليون مصرى علشان يفضل راكب يتسجن أد إيه
أنا / عندك ما يثبت
هو/ يانهار اسود عندي مليون حاجه تثبت
أنا/ فين هى
هو/ اذا كنت تقصد الأوراق وتزوير الأوراق فدى لعبتهم أما أنا بكلمك من خلال الدنيا بتاعتنا اللى هما مالهمش دعوه بيها
أنا/ لكن دولتهم هى اللى بتحكم
هو/ دلوقت
أنا / وبكره
هو/ بكره راح يحصل فيه حاجات كتير وزى أوبامى ( يقصد الرئيس الامريكى أوباما ) ما بقى رئيس أمريكا ممكن أوى يبقى ايمن نور أو أى جدع مصرى غيره يبقى رئيس جمهورية مصر.
حاولت وهو فى حالة نشوه ان احقق مكسب سريع
أنا/ خلاص يبقى شاى انهرضه براءة فى صحة الرئيس الجديد فقام منفضا جلبابه المصرى الجميل وبانفعال صادق
هو/ لأ ياحبيبى مش كفايه بتوع امن الدولة ولاد... اللي جم طفحوا فلسعوا

3 - أم العيال
أثناء جلوسي عند صديق اعلم انه رجل خير وجدت إحدى السيدات قمحية اللون فى الثلاثين من عمرها ومعها طفلتها أهم ما يظهر فيها هو الكدمات السوداء تحت عينيها وجرح فى شفتها عليه بواقى دم متجلط . أعطاها صديقي بإحسان وسألها
* عملت محضر لجوزك يا أم مروه ؟
- ايوه يا حاج غصب عنه وعن المخبرين اللى يعرفهم فى القسم واللي فضلوا يشتموني علشان ماعملش محضر. لكن أنا فضلت أصوط على باب القسم لغاية لما عمالولى محضر وخدت تقرير من المستشفى وطلع باكتر من واحد وعشرين يوم يعنى قضية .
* شدنى قسوة الضرب لوجه هذه السيدة فسألتها لتكشف لى جذور ألامها
ضربك ليه يا أم مروه ؟
- عشان كان عاوز يبيع التلفزيون
* وباعه ؟
- لا قلت له خد روحى قبل ما تاخذ التلفزيون
* ليه متمسكة بالتلفزيون كدا ؟
- علشان ماكسرش بنفس ولادى وخليهم يتذلوا بالفرجة عند الناس. وبعدين هولا بيخرجنا ولا العيال بتروح جنينه كمان عاوز يبيع حتة التلفزيون اللى بيسليهم واللى لسه بدفع فى قسطه .
* هو بيصرف عليكم ؟
- من تمن شهور وهو ما بيدخلش علينا بيت
* وقبل كدا كان عامل معاكوا ايه ؟
- من أول ما أتجوزته من حداشر سنه وهو مشربنى المر
* هو شغال إيه ؟
- نقاش لكن عمرى ما شفته ماسك فرشه فى السنين دى إلا يمكن أربع مرات
* أمال إيه مصدر دخله ؟
- كان بيلعب طول الليل قمار على قهوة جنبنا بس بطل القمار على أيدي .
* أزاي ؟
- كنت كل يوم انزله وأفضل اشتم وكسر فى القهوة واطلبلهم الحكومة لغاية لما صاحب القهوة طرده ولما راح قهوة تانية فضلت ورآه لغاية لما بطل القمار
* لما بطل القمار أتعدل معاكى ؟
- بقى زفت وقطران وبدأ يجرى ورى النسوان دا راجل فاجر
*عمل إيه ؟
- أتجوز واحده وجابها تقعد معايا فى الأوضة أنا وولادة وقال قريبتى لغاية لما جالى إعلان وعرفت انه أتجوز قمت طرداها من عندي .
* أنت وعيالك قاعدين فى أوضة واحدة ؟
- أنا وأربع عيال قاعدين فى أوضة فى بيت مسنود بعمدان خشب علشان مايقعش الحمام شرك وفى الدور الأرضي تحت بير السلم اللى ساكن فيه شباب عذاب.
* حد فيهم بيضايقك ؟
- طلعت دين واحد فيهم الباقى كله اتأدب
* أمال مين بيصرف عليكم دلوقت ؟
- أنا
* منين ؟ ترددت قليلا وقالت بإحراج
- من أهل الخير حتى علاجي بيجيبه أهل الخير
* أنت عيانة بأية ؟
- عندى أزمة ربو فى صدري ولازم أتعالج ببخاخة
*وليه ما بتشتغاليش ؟
- أنا لمؤاخذه ممعايش شهادة ولو حد عاوز يشترى أو يشيل حاجه بشلها لكن شغل البيوت لأ.
* ليه ؟
- اللى بتشتغل فى شقة بتبقى رخيصة عند صاحب الشقة.
*وعياله مابيحنش ليهم ؟
- تصدق وتؤمن بالله مره أبنى الصغير فضل يجيب دم لمؤاخذه وطلبت منه يودية المستشفى والله ما سأل فيه لغاية لما كشفت عليه وجبتله العلاج
* بتعلمى ولادك ؟
-لازم
*ليه ؟
- علشان ما يطلعوش عره زى أبوهم اللى سابنا وراح أتجوز واحد تالته عندها خمسه وخمسين سنه
* ودي عاوز منها إيه ؟
- مجوزها علشان فلوسها وهى مسكاه بشيك بخمس تلاف جنيه وهى ست كبيرة عوزاه خيال مأته يونسها ماهو راخر بقى متنيل ومالوش فى موضوع الستات
*أزاي وهو مخلف منك أربع عيال ؟
- من تلات سنين وهو تعبان وجاله جلطات فى القلب وغير شرايين وحالته نيله
*وليه ما طلابتيش الطلاق ؟
- أأكل العيال ولا ادفع للمحامى
*ماتعرفيش أن فيه جمعيات بتساعد الستات ؟
- اسمع عنهم فى التليفزيون بس ما فيش حد فيهم ساعدنى
* ولا اهلك ؟
- الصعايدة عرضهم غالى لكن عوزنى أنا لوحدى وولادى لحمهم طرى لو سبتهم ح يرميهم وتكلهم ديابة الشوارع
* إيه اكتر حاجة نفسك فيها ؟
- أنى أطلق .

4 - حوار أخر مزاج
قابلته على القهوة فى حوالي العاشرة صباحا كان واضحا انه لم ينام سألته عن السبب قالى كنت باحشش .
* طلبت منه ان يعرف نفسه
_ أسمى محمد وعمرى خمسة وعشرين سنه وساكن فى مساكن بهتيم بشبرا الخيمة ومعاى دبلوم.
* كيفك حشيش بس ؟
_ بشرب مية ( خمور ) وحشيش وكيميا
* يعنى إيه كيميا ؟
_ ( يضحك من جهلى ) يعنى برشام
* كلمني عن قاعدة أمبارح ؟
_ دى بقى كانت تحدى يعنى لتكمل الشرب لتموت
* من أمتي بتاخد مخدرات ؟
_ وعمرى سبعتاشر سنة
* أبوك بيشرب ؟
_ طبعا بس الفرق أن أبويا وشلته كانوا بيتكيفوا كل أسبوع لكن أحنا عرض مستمر
* أزاي بدأت مشوار المخدرات ؟
_ طبعا بالسجاير اللى بدأتها وأنا عمرى أتناشر سنه لما زميلى أتريق على لأني عيل مابشربش ولما شربت فضل يدينى لغاية لما اجبرني أنى اشترى . ومن السجاير رحنا للبانجو وبدأت بسيجارتين فرفشة فى فرح ودلوقت بعون الله بنتعامل مع كل برتيتة المخدرات .
*مفيش حد فى البيت خد باله ؟
_فى مرحلة السجاير بس كنت بشتري برتقان علشان يضيع الريحة
*ودلوقت ؟
_ دلوقت علشان اقدر أفتح عينى الصبح لازم أمي تعملي كباية شاى حبر على الريق واشربلى سيجارتين.
* وبتشرب ليه ؟
_ ( ضحك ) أنا عارف زيك أن الشرب مالوش لازمه لكن مش قادر أديله ضهرى
* مين أكتر واحد بيطلب منك تبطل ؟
_ أبويا.
* وليه مابتسمعش كلامه ؟
_ لأني طول عمري على خلاف معاه
* جربت تبطل من نفسك ؟
_ ماينفعش لأن كل صحابى حوليا بالمخدرات فى كل حتة . وبعدين عيب لما أروح فرح أو حد يوجب معايا بحتة حشيش ومالفش سيجارتين أمال ح نضحك ونفرفش ونتراضى مع بعض أزاي ؟
* اكتر حاجة بتحس بيها وأنت اعد بتشرب مع صحابك ؟
_ اكتر حاجة بتيسطنى لما نافوخى يسيح وجسمى ينمل
* اشرحلى ؟
_ من غبر شرح يعنى نافوخك يروح فى داهية عاوز أقولك ساعتها بعمل أيه ؟
* ياريت ؟
_ فى مرة كنت راكب ميكروباص أنا وواحد صاحبي وكنا أخر تمام وفضل هو يكلمني فى موضوع وأنا أكلمه فى موضوع تانى خالص وبعدين اختلفنا ومسكنا فى بعض لغاية لما خلصنا واحد معرفة.
* بتحس أنك قوى لما بتشرب ؟
_ البانجو يخليك تحس ان ليك شأن كبير ويحرك لسانك ويخليك تتكلم ولو مع رئيس نيابة حتى لو مش فاهم حاجة وممكن بالشرب اقلع واحد هدومه وفيه شرب يخلى قلبك جامد ؟
* حصلت معاك ؟
_ طبعا فى مرة واحد صاحبي أتخانق مع حماته علشان بيشرب قمت أنا شاربله وفضلت اشتم أدام بيتهم لغاية لما أنقطع نفسي .
* أكتر مخدر بتحبه أية ؟
_ الحشيش طبعا
* ليه ؟
_ أولا البانجو فضحى والناس وأبويا بيزعلوا منى وكمان فى مرة واحد كبير قالى فى قاعدة شرب ان الحشيش كيف الملايكة ورغم أنى كنت لسه جديد فى الشرب لكن كلمته لسه معلقة معايا .
* تفتكر أكتر وقت كنت محتاج تشرب فيه ؟
_ يوم لما رفضتنى أكتر واحدة حبيتها فى الدنيا .
* عملت ايه ؟
_ طينتها مع صحابى اللى جم يجاملوني بالكيف. يوميها شربت حوالي تلاتة لتر خمرة ورجعت بتنا وأنا بخبط فى الشارع يمين وشمال وفضلت أرجع مية صفرا لأني ماكنتش كلت حاجة طول اليوم ؟
* كان إحساسك إيه فى الوقت دا ؟
_ فضلت أعيط على نفسى لأن الشرب ضيع حبيبتي منى وكمان لأني مش عارف أصلب طولى ووصل لبيتنا.
* ولسه بتشرب ؟
_ ياعم الكيف كياف
*يعنى إيه ؟
_ انت بتحسسنى أنك مش فى الدنيا دى خالص . الكيف كياف يعنى أنت بتمشى ورى كيفك مش ورى دماغك. وكمان كل صحاب عمرى واللى معايا فى الحلوة والوحشة كلهم بيشربوا معايا .
* أيه أكتر حاجة شجعتك على الشرب ؟
_ تلات حاجات صحابي وأمي لأني دلوعتها وكمان مسكت فلوس بدرى لأني باشتغل جنب المدرسة من وأنا عمرى أتناشر سنة .
* وأية رأيك فى اللى شجعوك ؟
- زعلان منهم وندمان على نفسى لكن مش قادر أبطل
* معقول ؟
- صدقنى ساعات بوصل لحالة ضيق جامدة وببقى عاوز اضرب نفسى بحاجة أو أرمى نفسى فى مصيبة فى الساعة دى بطلع غلبي كله فى سيجارتين مخدرات .
* حاولت تطلعه فى حاجة تانية ؟
- طالعته مرة فى الشغل وفصلت بالكونه حديد لزبون غنى قام كرمني بمية جنيه
* بتحس أن المخدرات بتساعدك انك تبتكر فى شغلك ؟
- على فكرة المخدرات بتوقف العقل مش بتشاغله وعلشان كدا أنا بشرب .
* كان ليك اى هوايات فى حياتك ؟
_ كنت بكتب شعر وماليت اكتر من أربع أجندات لكن لما حبيبتي رفضتني حرقتهم وانحرفت أكتر وحياتي أدمرت خالص.
* حصل فى مرة أتمسكت من الشرطة ؟
- كتير وربنا كان بيسترها لكن فى مرة كنت ح روح فى داهية
* أحكيلى ؟
_ فى مرة وقفني أمين شرطة فى كمين وكنا الفجر وسألني معاك مخدرات قلتله ببجاحة السيجارتين فى الدماغ مش فى الجيب ولو تقدر تمسك معايا حاجة خدنى أم مقلعنى هدومى كلها فى عز البرد وقعد يفتشنى وذودها وشتمني بأمي قمت من غير تفكير ضربته دماغ ومن بعديها ماشفتش حاجة من رجول أمناء الشرطة اللى ضربونى ولما جهة الظابط بالبوكس قلتله الحقنى ياباشا الأمين فاتشنى وعاوز ياخد فلوسى ولما صعبت علي الظابط مشانى .
* ياترى مأمن حياتك بأي فلوس ؟
_ أقل من خمس تلاف جنيه
*وفين بقيت فلوس شغلك وتعبك ؟
_راحت على المزاج واللبس
* والفلوس اللى معاك دى حلال ؟
_ لأ وعلشان كدا مش راضى أديها لبويا يصرفها على أخواتي وأمى
*و ح تعمل بيها إيه ؟
_ ح تتصرف فى الهلس
* ليك أي حلم فى حياتك نفسك تحققه ؟
_ أنى أبقى ملتزم دنيا ويبقى عندى مزرعة خيول لأني بعشقهم أو على الأقل أوضة على سطوح وزوجة صالحة وولاد أصلح حالهم واصرف عليهم من حلال
* حاسس انك قادر تحقق حاجة فيهم ؟
_ أبدا لأنى لو كنت قادر احقق أحلامي في الواقع ما كنتش لجأت لوهم المخدرات وقعدت أدامك مدمر كدا
* ثم أنهى حديثه معى عندما اتصل به احد أصحابه لعمل أسصطباحة.

5 - يا فرحة ما تمت
شئ غريب لاحظته وأنا داخل حارة أحد معارفي لحضور فرح أبنه فلم أجد لمبة مضاءة ولا كوشة فرح . وعندما لمحت أبو العريس يجلس على كرسي منكسر النفس أسرعت نحوه لأطمئن.
* مالك يابو عبده وفين العريس ؟
_ فى السجن
* يا ليله سودا ليه ؟
_ ظابط لفق له قضية هيروين
* مش معقول الكلام دا ؟
_ ( صرخ الرجل وهو يقلب ترابيزة أمامه عليها كوب شاي ) ياعم وحياة النبي وحياة المسيح ومن خالقهم بقولك لفقله قضية هو برئ منها
* ( أخذت مجهودا كبيرا حتى أعيد الرجل لبعضا من هدوئه الخارجي ) أنا بس مستغرب يعمل فيه كدا ليه ؟
_ أصل عرض على أبنى انه يشتغله مرشد اكتر من مرة وأبنى رفض قام مهدده انه ح يلفق له قضية.
* وكان رد ابنك إيه ؟
_ قاله اعمل اللي أنت عاوزه بس مش ح عرس على ولاد منطقتي أو صحابي. ولغاية دلوقت كنا مفكرين الموضوع كلام وخلاص.
* وهو يعرف أبنك منين ؟
_ أبنى مضروب بالأفراح بيروح يرقص ويشرب هو وصحابه ونفس الظابط خده اكتر من مرة وأخرهم كانت فى خناقة كبيرة وحكموا على أبنى.
* فى القضية دى أبنك كان جاني فعلا ؟
_ أيوه وخد جزائه وأتسجن.
* وبعدين ؟
_ لما خرج قررت ألمه جبتله عربية ميكروباص يشتغل عليها وقلت أجوزه .
* ( رغم المخاطرة قررت اسأله ) معلش مش يمكن أبنك ليه فى موضوع المخدرات دا وأنت ماتعرفش ؟
_ فى القضية اللى فاتت أنا قلت أمين ولو قالي معاه حتة حشيش بيشربها ح قول أمين لكن هيروين وبيتاجر لأ وألف لأ . أصل أنا كنت موجود وهو بياخد أبنى الساعة أتنين بالليل .كان بيشطب فى شقته مع الصنايعية .
* ماسألتش الظابط جى ياخد أبنك ليه ؟
_ قالى عليه حكم قديم وح يقضيه.
* وعملت أية ؟
_ تانى يوم جبت محامى فرحني فى الأول أن أبنى ماعلهوش قضايا قديمة وبعد كدا صدمني أن الظابط عامله قضية بتلاتة وأربعين تذكرة بودرة عارف الرقم دا ليه.
* ليه ؟
_ علشان يظبط القضية . قال يعنى راجل عنده ضمير وماقلش خمسين تذكرة .
* طيب المحامى قال الحل إيه ؟
_ المحامى صارحني أن أبنى فى خطر وطلب عشر تلاف جنيه.
* ليه كنير كدا ؟
_ قالى والله اعلم أن كان صادق ولا كداب انه ح يرش منهم أربع تلاف علشان يبعد أبنى من قدام قاضى مفترى فى قضايا المخدرات ويودية أدام قاضى تانى .
* وعروسة أبنك وأهلها موقفهم إيه ؟
_ رحت قلتلهم على كل حاجة بصراحة.
* وتقبلوا الوضع ؟
_ رجعولى الدهب رغم أنهم متأكدين أن ابنى برئ
* ليه ؟
_ علشان كلام الناس .
* المهم دلوقت أن يرجعلك أبنك بالسلامة
_ تصدق بالله بعد ما صرفت فلوس دهبه وفرحه على القضية مانى عارف ح يطلع براءة ولا لأ.

6 - وجع القلب
شعرت بقلق عندما ذهبت للمستشفى لزيارة قريب لى ولم أجد أم وليد . سألت عنها لم يعرف أحد فى الإدارة اين هى واكتفوا بمجئ عامله مكانها . لم يدلنى إلا عامل الأمن الذي رآها تسقط على الأرض وركبها توكتوك ليسرع بها لمستشفى التأمين فأسرعت بدورى لكى اطمئن عليها وعلى الرغم من اصرارى على عدم إزعاجها إلا أنها أصرت أكثر على أن تفضفض .
*حمد الله على السلامة يام وليد دا أنت غالية علينا قوى
- بصراحة يابنى المرض كاشفلى انى مش غالية عند حد خالص لا شغلى ولا أبنى ولا البلد
* ازاى ؟
- تصدق ان المستشفى اللى كنت شغالة فيها كانت ست ادوار وكنت شيلاها أنا وواحدة زميلتى كنس ومسح وخدمة للإدارة والدكاترة والمرضى وساعات كنت بعمل ده لوحدى لما زميلتى تغيب وأنت كنت بتشوف بنفسك.
* ودخلك من شغلك كان بيكفيك ؟
- مرتبى تلتميت جنيه وكان بيجيلى زيهم من المرضى وزوارهم بس بعد ما يهدوا حيلى .
* بتشتغلى كام ساعة ؟
- من عشرة الصبح لعشرة بالليل علشان مايجبوش عمال تانيين وينخفض الأجر للنص
* طيب ليه ما تعالجتيش فى المستشفى اللى أنت شغاله فيها ؟
- ( ابتسمت ابتسامة مبكية ) دى مستشفى انا فيها علشان اكنس وامسح بس .
* كتبوا معاكى عقد يحفظ حقك ؟
- بشتغل من غير أى حاجة
* ليه ؟
- لأنى لوطلبت ح يمشونى
* لما تعبتى حد جالك من ادارة المستشفى
- عرفت انهم جابو واحدة مكانى وح يخدوا صحتها ويرموها زى مارمونى
* طيب ح تعيشى ازاى ؟
- الحمد الله انا ليه معاش منا كنت شغاله تمرجية فى مستشفى حكومى
* معاشك أد إيه ؟
- 270 جنيه
* ح يكفوك ؟
- لأ بس فيه دكتور من المستشفى جالى وطلب انى اشتعل فى عيادته من الساعة أربعة للساعة حداشر بالليل وح يدينى 130 جنيه
* وح تقدرى تشتغلى ؟
- افتكر من ساعة ماوعيت على الدنيا وأبوى بيشغلنى أنا واتنيين بنات اخواتى
* والصبيان
- كنا تلات بنات وتعلمنا أزاى نعتمد على نفسنا من صغرنا وعمرنا ما احتجنا لحد
* وعملتى كدا مع ولادك ؟
- للأسف حاولت أعوضهم موت أبوهم لكنى فشلت مع ابنى وليد .
_ عمره اد ايه ؟
- 32 سنه وطول عمره يسرق شقاى ويشرب بيه سجاير جوزته مرتين من مكافأة نهاية الخدمة بتاعتى وقبل ما ادخل المستشفى جه نصب على وخد تلتميت جنيه علشان قالى ان بنته فى المستشفى
* وبناتك ؟
- دول اللي عاوضنى بيهم ربنا الصغيرة بجهز لها وهى بتشتغل فى مستشفى وبتساعد نفسها والكبيرة أتخرجت وسافرت مع جوزها للسعودية بس فى خلافات هى وجوزها من ساعة ما سافرت ونازله الأسبوع الجاى على طلاق وح تولد عندى
* طبعا الدكاترة قاللولك تستريحى وخدى علاجك ؟
- بعد ماعملت دعامتيين فى القلب من سنه الدكتور قالى لازم تفتكرى سنك ووجع قلبك وخرجت من المستشفى اشتغلت . المرة دى قالى احمدى ربنا جالك جلطة وفلاتى منها بأعجوبة وبرضة حا خرج اشتغل ما فيش مفر يا بنى .

7 - بحلم وأنا ماشى
فى الواحدة صباحا وإثناء تناولنا للعشاء المعتبرعند بائع فول فى السيدة زينب رأيت شابا نحيلا يمسك شنطة بلاستيك بها حوالى ربع كيلو لب يبيع منها على رواد المقاهى . وعندما اقترب منى مترددا ليعرض على كيس لب صغر بنصف جنيه تركت العشاء والأصدقاء وتمسكت بالحوار معه الذي لم يبدأه معي إلا عندما استشار بائع الفول وجاء يستأذني فى عدم نشر اسمه كاملا وصورته ثم عرفنى بنفسه
- اسمى نبيل وخريج دبلو تجارة سنة 2003 وعمري 23 سنة يعنى بقالي ست سنين فى الشغلة دى .
* بتشتغل بفلوس أد ايه ؟
- بجيب ربع كيلو اللب وربع سودانى والف بيهم ولما صنف فيهم يخلص بروح أجيب ربع تانى اصل فيه مقالى اللب فاتحة للفجر
* تقريبا بيطلعلك كام فى اليوم ؟
- لما كان كيلو اللب ب تمانية جنيه كنت بكسب كويس يعنى حوالي خمستاشر جنيه وممكن اقفل البريزتين ( عشرين جنيه ) دلوقت كيلو اللب بقى بربعة وعشرين جنيه ونزل مكسبى لحوالى سبعة جنيه
* وعندما لا حظ نبيل ملامح الاستغراب على وجهي بادرني قائلا
- صدقني يا بيه أنا صحيح بخاف من الحسد ونق اللي حوليا على شغلتى ورزقى لكن صدقني أنا بكسب ستة سبعة جنيه فى سرحة بالليل لكن علشان أكون صادق معاك أنا بشتغل شغلة تانية
* هى إيه ؟
_ باشتغل فى فرن وبيدونى تلاتاشر جنيه ولو حد عنده دكان ولا عربيه وعاوز ينضفهم ما بتأخرش يعنى الحمد الله مستورة
* احكيلى بتعيش يومك ازاى ؟
_ الساعة تمانية الصبح بكون فى الفرن وبروح الساعة تلاتة وبنام من الساعة أربعة العصر واصحي تمانية بالليل وانزل لرزقى من الساعة تسعة لغاية الفجر وروح أتقلب أنام لغاية سبعة الصبح علشان الفرن بس ساعات باجى من الفرن أفضل نايم ولما أجي اصحي ألاقى عضمى مكسر وفضل نايم لكن لما بفتكر أنى محتاج مصاريف أنا وأمي بروح نازل حتى لو الساعة اتناشر بالليل واسرح للفجر وارضى برزق ربنا .
* وأسرتك فين ؟
- أنا عايش مع امى بعد وفاة أبويا ومعانا اخيين ويادوبك معاشها مكفيهم بالعافية . بصراحة فى الأول كنت قاسى عليها ولما كبرت وفهمت وبقت هى صاحبة مرض بقيت بحن عليها وأبوس أديها واجيبلها شريط البرشام اللي بيخلص من علاجها
* أبوك كان شغال إيه ؟
- كان موظف فى السكة الحديد وكان شايل مسئوليتنا ومسئولية أهله فى البلد . الحمل كان تقيل عليه قوى ومات فى الجلطة التالتة .
* أنت اشتغلت وعمرك أد إيه ؟
- تصدق شقيت اكتر من أبويا وبدأت الشقا وعمري سبعتاشر سنة وعلى فكرة أنا بدأت ببيع المناديل علشان جسمى ضعيف وبعدين قلبت لبييع اللب .
* حاسس أنها شغلة كويسة ؟
- كنت بحسبها كدا
* وإيه اللى حصل ؟
- اول يوم شغل لى لبست هدوم حلوة اللى كان جايبهالى أبويا الله يرحمه وسرحت شعري واخترت مدينة نصر علشان ناس هايصة ودخلت أول قهوة بالمناديل علشان استفتح وفجأة لقيت صاحب القهوة بيشتمنى وطردني برة وقالي إشكالك ما بيخشوش قهوتى
* دى اكتر إهانة أثرت فيك ؟
- لأ طبعا اللى مآثر فى أوى ان كان لى صديق حاسيت انه بيتهرب منى صممت أقابله واعرف السبب فقالي بصراحة شغلتك دى ح تعرنى . وموقف تانى فى مرة وأنا سارح باللب دخلت قهوة لقيت اخويا فيها رحت اسلم عليه مرضاش يسلم على وسط صحابه ولما عاتبته قالي أمشى يا مهزئ .
*وأحسن حاجة فى شغلتك اية ؟
- أنى مش محتاج لحد وأنا اللي بدى لأمى واخواتى . وكمان في شغلتى حاجة بحبها أنى بفضل ألف فى الشوارع اصل وأنا صغير ماكنتش بخرج من البيت خالص وماكنش لى ولا صاحب يعنى كنت معزول عن الدنيا دلوقت أنا فى قلب الدنيا
* تذكرت جملة قالها لى نبيل قبل الحوار لها دلاله فسألته عنها ؟
- الجنية بيقول الحقيقة يعنى لو معايا عشرة جنية ممكن اعرف اللى قدامى بيحبنى ولا طمعان فى وبيحقد على . بصراحة انا بحترم الجنية وبطاطى للى يسوى واللى مايسواش علشان الجنية هو اللي بيأكلنى وييلابسنى
* وإيه الحلم اللي نفسك تحققه فى الدنيا ؟
( عند هذا السؤال وجدت نبيل بدأ ينتبه وتغير نبرات صوته واستقام ظهره وطلب منى لأول مرة فى الحوار أن اذكر اسمه كاملا وهو يبوح لى )
- أنا نفسي أمثل وعلى فكرة وأنا فى ابتدائي كنت بامثل فى كل حفلات المدرسة وكنت باعمل أنى باعيط للمدرسين علشان يضربونى باراحة وكانوا بيصدقونى .
* ثم اعتدل نبيل وكأنه سيقرر أمر هام
- والله العظيم يا بيه أنا بمثل أحسن من ممثليين كتير فلقوا دماغنا بأفلام هايفة.
ثم بدأ بنبيل يحلل بعمق الأفلام التى يحبها مثل فيلم حين ميسر للمخرج خالد يوسف الذي يعجبه لأنه يجسد واقع الغلابة وكذلك أحب فيلم هى فوضى للقدير يوسف شاهين وفوجئت بغزارة معلوماته عن السينما الأمريكية التي يعرف نجومها ومخرجيها ومنتجيها ويتحدث عن أفلامها كخبير . ثم توقف عن الكلام وكأنه تذكر شئ أحزنه
* مالك يا نبيل ؟
- فى مرة قابلت فنان كبير كان باكل عند كبابكى مشهور فى السيدة ولقيتها فرصة وفضلت أتحايل عليه يشوفلى فرصة ولما طلب منى امثل اخترت أصعب مشهد جه على بالى وكان عبارة عن شخصية بتعيط وبتضحك فى وقت واحد واندمجت فى الدور لدرجة أن جسمي أرتعش وفقت من اندماجي على صوت ضحكه العالى وهو والبنت الفرفورة اللي معاه .
* ولم ينسى نبيل ان يطلب منى لو جائتنى فرصة للتمثيل له أن ابلغ عم سعيد بتاع الفول الذى نجلس عنده لأنه يمر عليه كل يوم
*ورأيك إيه فى البياعين الغلابة زمايلك ؟
- مش كلهم طيبين صحيح فيهم واحد ساعدني كتير بس كان بياخد فلوس فردة من بياعين تانية وكمان كان بياخد عرق واحد عند متخلف عقلى . تصدق ان فيهم بيتخانقوا مع بعض علشان من فيهم ياخد حته اكبر من الرصيف علشان يفرش عليها بضاعته أو ينام عليها . لكن اكتر واحد أذاني من البياعين كان بياع جرايد .
*عمل معاك إيه ؟
-كنت فى الوقت دا ببيع جرايد لقيته واقفلى وقالى أنت كدا بتاخد لقمة عيشى حاولت معاه انه يسبنى استرزق لكن صمم انه يمنعنى . ولما صممت وسرحت بالجرايد لقيته وقفني وضربني بمطوه فى رقابتى وهددنى ان المرة التانية حا يخلص على . ولما روحت البيت ماعرفتش ابلع لقمة لان ريقى نشف زى الحجر وحاسيت أن فى معدتى نار وفضلت عيان فى البيت لغاية لما الحزن نطر حبوب على جسمى ساعتها روحت للدكتور قالى ماتكلش إلا جبنة وعيش ونصحني أنى أرمى همومي على الله علشان يسترها معايا
* أنت حاسس أن ربنا واقف معاك ؟
- دايما ووسط الشقا بحب أفرج عن نفسي واعد أفضفض معاه وترجاه يقف جانبي ويدافع عنى وياما دافع عنى فى أزمات كتير زى أزمة بياع الجرايد هو اللي نجاني منها وخففني
* ومين اللي ظلمك ؟
-المجتمع ظلمني فى كل حياتي وكمان أنا ظالم نفسي .
* ازاى ؟
_ أنا ظالم نفسى لأني حرمتها من متع الحياة لدرجة أنى كنت بحب بنت ونفسى أتجوزها وقطعت علاقتى بيها علشان معذبهاش معايا . يعنى ظلمى لنفسى غصب عنى . عارف يوم فرح حبيبتي كأنك قطعت قلبى بسكينة
* أردت ان اخرج نبيل من حالة الشجن فسألته عن ماذا يعنى له بكرة فأدهشني بهذا الحلم السينمائي
_ بحلم اصحي بكرة وأمشى ساعة الفجر والمطر نازل كتير وأدامى الطريق كله مفروش خضرة وتطلع على الشمس بحياة جديدة .

8 - مضروب بورصة
منذ تخرج وائل فى كليته منذ أربعة عشر عام وهو ينطلق كالسهم في طريق تطوره . فى البداية اعتمد على علاقات والده كضابط مخابرات وبدأ مشواره العملي فى شركة كبيرة وتزوج ثم شارك آخرين في تجارة الأدوات الكهربائية ثم توسع هو وآخرين في تجارة الجلود ثم بأسرع مما يتصور خسر كل شيء وعاد لنقطه الصفر ويعمل الآن في عمل مؤقت لكي بأمن بمصاريف بيته الضرورية لذلك كان على أن أقابله واعرف ما حدث
* خسرت أد إيه ؟
- خمسمائة ألف جنيه
* فين ؟
- فى البورصة
* أزاي ؟
- الحكاية بدأت أن تجارة الجلود كانت ماشيه معايا كويس وكونت منها مبلغ وسمعت عن مكاسب البورصة قلت أجرب بجزء واشتريت أسهم بخمسين ألف جنيه ولعبت معايا وكسبت منهم 12 ألف جنيه
* خدت فلوسك ومكسبك ؟
- لا هنا بقى سحر البورصة انك لما بتكسب مابتخدش لكن بتزود دا اللي حصل اشتريت أسهم اكتر
* كسبت ؟
- طبعا يكفى ان كل يوم بروح ساعة أو ساعتين اكسب ألف جنيه وأمشى
* وتجارتك وشركتك ؟
- بدأت أصفى وادخل بكل فلوسي البورصة مكاسب مهوله وسهلة ولا المخدرات
* أمال إيه اللي حصل ؟
- اللى حصل لعبه كبيرة عملتها الحكومة ورجال أعمال كبار خربوا بيت ناس بسيطة كتير زى حالتنا
* مش مشكلة البورصة دى عالميه ؟
- لأ البورصة عندنا اتضربت من 5 شهور قبل انهيار البورصات العالمية باظبط بعد قرارات احمد نظيف بزيادة أسعار الطاقة على مصانع رجال الأعمال وبعد كدا جت الأزمة العالمية ضربت كل حاجه
* أزاي ؟
- لقيت أسعار الأسهم بتاعتى نزلت من 70 جنيه إلى 56 جنيه
* مابعتش ليه ؟
- أستنيت أنها تطلع
* طلعت ؟
- لآ نزلت 49 جنيه
* بعت ؟
- لآ قلت يمكن تطلع 56
* وبعدين ؟
- نزلت لأربعين
* مش غريبة ؟
- أمال لو عرفت انى فضلت استني السهم يطلع لغاية لما نزل سعره 17 جنيه
* ممكن تقنعني عملت كدا ليه فى نفسك ؟
- البورصة دي أمار رغم أنها حلال دينيا لكنها لعبة أمار. بيفضلوا يضغطوا على الناحية النفسية والطعم اللى بيشدوك بيه هو المكسب السريع
* شفت بنفسك ناس خسرت ؟
- كتير وإحنا جانبيهم ولا حاجة
* زى مين قولنا نماذج ؟
- زى واحده اسمها صباح جت من ليبيا معاها ثلاثه مليون جنيه خسرتهم كلهم وواحد اسمه جورج كان صاحب محل ذهب باع المحل ودخل بكل فلوسه البورصة خسرهم ودلوقت شغال سواق تاكسى واحد اسمه الشيخ مصطفى كان معاه أربعه مليون جنيه فضل يكسب لما بقوا ثمانية ونصف بعد كدا خسر لغاية لما بقوا اثنين مليون استلف أسهم بضمانهم وفضل يخسر لغاية لما بقى مديون بمبلغ 56 ألف جنيه وعنده تسع أولاد ومش عارف يجوز بناته .
* شفت حالات انهارت بعد خسارتهم في البورصة ؟
- واحد خسر كل فلوسه جاتله لوسة فى عقله قلع كل هدومه ونزل يجرى عريان في الشارع وواحد كان معاه 12 مليون وكسب وخلاهم 20 مليون وفجأة خسرهم مات أدام الشاشة . غير ناس كتير كانوا واخدين فلوس من ناس تشغلها فى البورصة وكاتبين على نفسهم شيكات وخسروا كل حاجه ومرفوع عليهم دلوقت قضايا وطفشوا من بيوتهم وغيرهم كثير من أساتذة جامعه ومستشارين .
* كل دول مضاريب بورصة ؟
- أيو لأنهم شافوا سهم ثمنه جنيه فضل يطلع لما بقى ثمنه 275 جنيه وبعدين رجع فى ثلاث شهور بقى 51 جنيه
* هى البورصة سحراكم ؟
- أيو بدليل ياما ناس أتحايلت على علشان اخد فلوسهم اشغلها فى البورصة
* سبب سحرها إيه ؟
- طمعنا ونصب الحكومة شرف الإعلانات اللى بيكلوا بيها عقول فيه إعلان ببقول سهم فى الأيد أنت مالك ومستفيد يعنى بالعربي الناس تطلع فلوسها من البنوك اللى فوايدها 10 % وتروح البورصة اللى مكاسبها تسحر وفجأة يخسروا كل حاجه .
* خدت فلوس من حد تشغلها ؟
- خدت ورث مراتى وخدت فلوس نهاية خدمة أبويا
* ليه ؟
- اشتريت بيهم أسهم تعوضنى خسارتى
* عوضت ؟
- خسرتهم برضه
* فكرت ترجع لمشاريعك وتجاربك تانى ؟
- ماينفعش
* ليه ؟
- لأنه سوق الجلود اضرب سعره ورخص سعره لربع تمنه وماحدش بيشترى حاجه وكمان ما عدش عندى أى دافع للشغل بعد ما خسرت شقى 14 سنه لسه ح بدأ تانى من جديد ماينفعش
* وناوى تعمل ايه ؟
- اجمع فلوس وارجع البورصة
* تانى ؟
- مافيش حاجه فى الدنيا ح تعوضني خسارتي إلا البورصة يكفى أن مكاسبها اكتر وأسرع من المخدرات
* مكسب سريع وخسارة أسرع ؟
- ولو لكن فيه أمل المكسب وإحنا بنلعب على الأمل دا .

9 - ربنا على الأرض
بلهفة ننتظر أنا ومجموعة من الأصدقاء مساء الخميس من كل أسبوع لنرمى حمل هموم الحياة من على قلوبنا ونندمج فى ضحكات وقفشات تبهج الروح. وفجأة أنقطع عن الجلسة أحد الأصدقاء الذي تربطني به صداقة منذ طفولتنا. عبثا حاولت الاتصال به فوجدته غير رقم محمولة وباع شقته فى 15 مايو وظل مختفيا لعدة سنين وما أن ظهر حتى كشف لى ما حدث.
* فينك يا فؤاد ؟
_ طفشت أنا وولادى وعشنا فى الشرقية
* ليه ؟
_ بسبب رئيس المباحث
* ياريت تفهمنى الحكاية من الأول ؟
_ الموضوع بدأ مع واد أد ابني بيشتغل مرشد وفاتح محل بقاله وراحلة ابنى الصغير عمره تمن سنين وباين أن أبنى وقع حاجة من المحل أم ضربه الواد المرشد ومن هنا أتفجرت المشكلة
* أزاي ؟
_ كان أبنى الكبير عمره عشرين سنة واقف فى البلكونه وشاف أخوه الصغير بينضرب نزل جرى ونزلت ورآه لقيت المرشد وواحد معاه بيضربوا أبنى الكبير قمت ماسك فيه لقيته دخل المحل وجاب سكينة وضربني فتح رجلي
* وبعدين ؟
_ أتجمعوا الناس وبعدونا عن بعض وأنا خدت ولادى وروحت
* وليه ما عملتلوش محضر فى القسم ؟
_ أنا ماليش فى المشاكل ورغم أنى أضربت أنا وولادى من واد أد أبنى قلت ألم الموضوع وياريت دا عجبه
* كمان ؟
_ مفيش دقايق ولقيت ميكروباص فيه أمناء شرطة طلعولى فتحت لهم مراتى سألوا عنى فاجت تنادينى من أوضة بغير فيا بنطلونى المقطوع من السكينة خرجنا لقينا مفاجأة
* إيه هي ؟
_ لقينا أمناء ومناديب شرطة صغيرين فى السن واحد فيهم ماسك سكينة كانت مراتى بتقطع بها خضار قبل المشكلة وماسك فى الأيد التانية عصاية شمسية بنزنق بها الباب
* ليه ؟
_ علشان يلبسوني قضية ؟
* أزاي ؟
_ أمين الشرطة قالى دول العصاية والسكينة اللى أنت أتخنقت بيهم قامت مراتى صرخ فيهم قالت لهم انتم جايين ترموا بلاكوا علينا. يقوم أمين الشرطة المحترم يعمل أيه
* عمل أية ؟
_ شتم مراتى وعاوز يضربها فى بيتى . قمت ماسك فيه لقيت كل أمناء الشرطة بتضرب فى أدام مراتى وعيالي وجرجروني لرئيس المباحث اللى شغالين معاه.
* وبعدين ؟
_ رحنا القسم مالقوش رئيس المباحث نزلونى عند ضابط الاستقبال طلع أبن حلال
* عمل ايه ؟
_ لما حكيت ليه كل حاجة وتقريبا شاف أنى راجل كبير وماليش فى المشاكل بعت جاب الواد المرشد وسأله قام قال أنى ضربته وعاوز يعمل تقرير طبى . لقيت الضابط الطيب بيشخط في
* ليه بقى ؟
_ قالي أنت مافكش حاجة فكشفت له عن القطع الذي فى رجلي فقالي من مصلحتك تعمل بيه تقرير طبي
* وبعد التقرير حصل أية ؟
_ الضابط الطيب أعتذرلى انه لازم يدخلني أنا والمرشد الحجز علشان نتعرض على النيابة تانى يوم
* وعملت أيه مع السوابق اللى فى الحجز ؟
_ تصدق أنهم طلعوا عندهم رحمة عن اللى بره
* معقولة !
_ أول لما عرفوا أنى مدرس ثانوي وهو مرشد رزعوه علقة وفضلت معاهم لغاية لما أتعرضنا على وكيل النيابة.
* حصل أية معاه ؟
_ سألنا سؤالين أنا والمرشد وخرجنا لقينا معمول لينا قضية أنا بالعصاية وهو بالسكينة رغم أن الأتنين من شقتي . ومشيت القضية وخرجت انا والمرشد من القسم.
* وليه ماتمسكتش بحقك وقلتله كل حاجة ؟
_ الوحيد اللى سمعنى وزير الداخلية
* ووصلتله أزاي ؟
_ مراتى كتبت له استغاثة وحكت له عن بهدلتي وبعتتها فى فاكس.
* رد عليكوا أمتي ؟
_ تانى يوم لقينا تليفون من مقدم شرطة تقريبا وقال انه جى من الوزارة علشان يحقق فى شكوتنا وطلب حضور مراتى معايا لأنها اللى كتبت الشكوى.
* حسيت بايه فى الوقت دا ؟
_ بصراحة خفت أروح القسم فى الميعاد إلا وأنا معاي محامى.
* وعملوا أية معاكم فى القسم ؟
_ لقينا ظابط من القسم فى انتظارنا وصمم نشرب حاجة ودخلنا للمحقق اللى اتصل بينا
* وجاب ليكم حقكم ؟
_ قال أنا مش ح تحرك إلا لما تاخدوا حقكم بس الأول اقعدوا مع رئيس المباحث ولوا ماحلش الموضوع تعالولى
* وأيه علاقة رئيس المباحث بالموضوع ؟
_ أصل أمناء الشرطة اللى ضربوني بيشتغلوا معاه وعمرهم ما ح يعملوا حاجة إلا بآمرة
* وحل المشكلة ؟
_ أبدا دخلنا مكتبه قام تجاهلنا وفضلت قاعد أنا ومراتى وهو بيحقق مع ناس أدمنا بطريقة غريبة جدا وكأنه بيعمل لينا كارت إرهاب.
* أزاي ؟
_ يعنى قال لواحد تطلع من هنا تعزل من مدينة 15 مايو وعرفت بعد كدا ان الراجل عزل فعلا . وكأن رئيس المباحث ربنا على الأرض لدرجة ان محامى كبير رفض يجى معانا خوفا منه والمحامى اللى قبل يجى خد مننا الفلوس وجهه أدماه فضل يشكر فيه. ولما الموضوع سخن طلع جرى على بره خاف نتحبس أحنا وهو .
* المهم عمل معاكم إيه ؟
_ بعد فترة طويلة بصلنا قالنا انتم عاوزين أية. مراتى قالتله عاوزين حق جوزي اللي اضرب من رجالتك أدام ولاده. قالها ح تاخدوا حقكم من مين دا أحنا الحكومة.
* وكان ردك أية ؟
_ مراتى هى اللى صرخت فيه وقالتله إذا كنت أنت الحكومة فجوزى مدرس ثانوى واشرف منك ومن كلابك اللى ضربوه وح نعرف ناخد حقنا منكم. وسبنا مكتبه ومشينا.
* وبعدين ؟
_ لقينا نائب المأمور والمأمور ورانا فى الشارع وبيستأذنونا إننا نرجع.
* والمحقق بتاع الوزارة عمل إيه ؟
_ كتبلنا محضر زى ماحنا عاوزين وحول المحضر للتحقيق.
* أمال هربت من شقتك ليه ؟
_ لأن بعد المحضر دا بدأت التهديدات من رئيس المباحث وأمناء الشرطة
* بيهددوك بأية ؟
_ بولادى وبعد ما عرفت أنهم عذبوا راجل فى قسم من الأقسام ورموه من سطح القسم ونزل ميت خفت على عيالي وبعت الشقة وهربت فى مكان ما يعرفنيش فيه حد
* وشغلك ؟
_ كنت بسافر كل يوم أنا وأبنى من الشرقية للقاهرة رايح جاى هو للكلية وانا لشغلي.
* وجبت مصاريف لكل دا منين ؟
_ صرفنا تمن الشقة وقرشين بساط كنت شايلهم للزمن.
* والقضية وصلت لأيه ؟
_ واحد شغال فى المحكمة قالى ممكن أشلك القضية وخلاني أجيب حاجات بتلات تلاف جنيه.
* جبت أيه ؟
_ نزلت معاه خالنى اشترى مراجع قانونيه وأكل فاخر وقام وخده منى ووصلهم.
* لمين ؟
_ والله ماعرف المهم أن القضية اتشالت أزاي ماعرفش.
* مش يمكن نصب عليك والقضية كانت خلصانه عند وكيل النيابة ؟
_ والله ممكن أصل لغاية دولقت ما قرتش صفحة واحد فى القضية اللى خربت بيتى .
* وليه رجعت تانى لنفس المكان ؟
_ لما عرفت أن الوزارة حققت مع رئيس المباحث ونقلوه هو وأمناء الشرطة من هنا
* وحسيت بنقله انك خدت حقك ؟
_ أولا بشكر الوزير وبشكر كل اللى ساعدوني فى وزارة الداخلية لكن نقل رئيس المباحث بكل امتيازاته لمكان تانى عمره ما ح يعوضلى حياتي اللي أتخربت ولا شقتي اللي زاد تمنها لست أضعافها ولا كرامتي اللي أتهانت بضربي من أمناء الشرطة أدام ولادى ومراتى .